Кез келген ұлттың рухын көтеретін идеологиялық мықты құралдардың бірі – оның тарихы. Ал қазақтың бүгінге дейінгі тарихы әлі түгенделіп, бағасын алып болған жоқ. Сол тарихты тірілтетін салалардың бірі де бірегейі – антропология. Атыраудан Алтайға дейінгі кең даланы тап біздің халықтың тікелей бабасы елу ғасырдан бері мекен етіп келе жатқанын дәлелдеуге ғұмырын арнаған қазақтың тұңғыш антрополог ғалымы Оразақ Смағұловтың кешкен бейнеті мен көрген зейнеті кім-кімді де бейжай қалдырмасы анық. Ғылым жолына бар ғұмырын арнаған тұлғаның теперіші мен тағылымы мол тағдырынан сабақ алып, жанкешті еңбекқорлығы сүйсінтпей қоймайды.